Заев: Ќе бидат отворени пунктови за вакцинација во Прилеп и Велес

За време на вчерашната посета на нашата земја од страна на комесарот за соседство и проширување на Европската Унија, Оливер Вархеји и сојузната австриска министерка за Европа и Устав, Каролине Едштадлер и заедничката обиколка на вакциналниот пункт во спортската сала „Борис Трајковски“ во Скопје, премиерот Зоран Заев најави отворање на два нови вакцинални пункта, во Прилеп и Велес.

Очекувам вакцинирањето да тече без престан. Обезбедени се ефикасни и безбедни вакцини и затоа апелирам до сите граѓани – пријавете се на vakcinacija.mk за да добиете термин за вакцинирање. На овој начин, со заинтересираност на населението, со обезбедени вакцини и со добро организиран систем на вакцинација, очекуваме да се промени целокупната слика на епидемијата во позитивна смисла и полека да влеземе во постигнување на колективен имунитет. Владата и Министерството за здравство веќе го иницираа формирањето на дополнителни регионални вакцинални пунктови за масовна вакцинација против КОВИД-19 во Битола, Охрид, Штип, Кавадарци, Тетово и Куманово, а многу бргу такви пунктови ќе бидат отворени и во Прилеп и Велес“, рече Заев на заедничката прес конференција со еврокомесарот Вархеи и австриската министерка Едштадлер.

Заев најави дека со количината од 120.000 „Фајзер“ вакцини кои ЕУ ги обезбеди како помош за Северна Македонија, заедно со пристигнатите вакцини од другите производители, како и со останатите договорени количини вакцини кои ќе пристигнат до крајот на годината, нашата земја влегува во процес на широка и обемна имунизација на севкупното население.

Во својата изјава премиерот Заев потенцираше дека сето ова не треба да придонесе за попуштање на вниманието и претпазливоста кај граѓаните, туку дека паралелно со масовната вакцинација, мора да продолжиме со примена на мерките за лична заштита, сѐ додека епидемиолозите и Институтот за јавно здравје не донесат други препораки.

ОСТАВЕТЕ ОДГОВОР

ве молиме внесете го вашиот коментар!
ве молиме внесете го вашето име овде